Friday, December 14, 2012

AMD 2012 : Meri peransang ngagai artis Dayak

RABAN Masterpiece benung dirandau emcee.
KUCHING : Anugerah Muzik Dayak (AMD) 2012 meri siti peransang ke pemadu besai reti ngagai semua artis Dayak laban berindik ari pemutus pekit ke baka nya meh ngujungka bala peminat industri muzik Dayak ulih ngelala naka ni pengulih enggau pengelandik seiku-seiku artis Dayak dalam bidang seni.

Bisi 19 kategori anugerah ditemu pemutus beserimbai enggau AMD 2012 ke diatur Gerempung Artis enggau Pemerindang Dayak tauka DAMA bepalan ba Dewan Tunku Abdul Rahman tauka DeTAR PUTRA, Universiti Malaysia Sarawak (UNIMAS), Kota Samarahan kena 24 November (Hari Enam) tu tadi.

Ba Anugerah Penau Seumur Idup 2012 diberi ngagai Niang Micheal Jemat (Kategori Iban), Julia (kategori Bidayuh) enggau Ukong Mering (kategori Orang Ulu).

Taun tu mega, DAMA bisi nyediaka sebengkah anugerah khas lalu atis ke bulih anugerah ke sekali tu iya nya raban Candy. Raban Candy ditumbuh taun 1996, lalu kala tebilang enggau lagu "Akan Ku Tunggu". Nangkan ke nya, nama raban Candy kala dipasuk dalam Malaysian Book of Record pengudah ke mujur numbuhka raban artis indu rock keterubah ba menua Malaysia.
GABRIEL Fairuz Louis
MELISSA Francis

Rintai artis ke bulih anugerah rambau AMD 2012 tu iya nya : Artis Lelaki Pemadu Manah : Gabriel Fairuz Louis, Artis Indu Pemadu Manah : Melissa Francis,  Lagu Dayak Pemadu Manah : Raban Hevance (Iban) , Romina Grey Melvin (Bidayuh) enggau Rosiana Urai (Orang Ulu), Artis Baru Dayak Pemadu Manah : Gabriel Fairuz Louis, Raban Vokal Pemadu Manah : Raban Taju Remaung,

Album Dayak Pemadu Manah : Embat Lala (Album Genggam Jariku - Gabriel Fairuz Louis) (Iban),  Edward Sayu (Snipers-MTV Karaoke Bidayuh) (Kategori Bidayuh), Daniel Bampa D' Sound -Tech Studio enggau album The best lagu kenyah Vol 3 (Orang Ulu),

Kulit Album Pemadu Manah : Donny Lang    , Video Pemadu Manah : Embat Lala (Album Kumang - Hailey), Leka Lagu Pemadu Manah : Harry Usup Umbar (Album Beserara Enggau Ai Mata - Melissa Francis), Tusun Muzik Pemadu Manah : Norman Ading/ Ethnic Transmissions (Ethnic Transmissions),

Artis Balada Pemadu Manah : Melissa Francis (Album Beserara Enggau Ai Mata), Artis Rock Pemadu Manah : Stevenson (Album Telih Di Ati Bedarah Di Mata), Artis Pop Kreatif Pemadu Manah : Rannee Pat (Album Aus Pengerindu Ketegal Nuan).

Pemutus AMD 2012 tu berindik ari pansik bala juri-juri profesional iya nya Jimbun anak Tawai, Paka Siam, Raynold Ebony anak Charles diyom, Snah Ukong, Stephen jeremiah Adam, Edmund Nangoi anak Robert Dais, Frederick Radin, Nancy Chee Kissam enggau petrus Alfred.
RABAN Candy nerima anugerah khas AMD 2012 ari DAMA.

Lebih 3000 iku peminat datai ngemataka pengerami AMD lalu sida bepeluang diperindang sekeda artis tebilang iya nya Jimmy Palikat, Raban Projek Pistol, Raban Candy, enggau mayuh agi artis Dayak ke bukai.
Tuai Raban Editor New Sarawak Tribune / Utusan Sarawak, William Chan nyuaka trofi ngagai Daniel Dampa pemenang kategori Album Dayak Pemadu Manah (Orang Ulu).
Mega bisi dikanggauka DAMA merindang maya malam AMD tu iya nya artis-artis jeman 60-an enggau iya ke diatu baka Datin Senorita Linang, Christopher Kelly, Urai, Jolly Jengan enggau Mike Rantai.

Beserimbai enggau pengerami tu, Mawan bisi nyuaka chek pemeri RM10,000 ari Opis Menteri Pemansang Sosial dikena nandaka sukung ngagai DAMA awakka terus ngemansangka industri muzik Dayak di nengeri tu.
TERIMA KASIH...Menteri Pembangunan Sosial, Tan Sri William Mawam Ikom nyuaka pemeri RM10,000 ngagai Chairman Gerempung pemuzik enggau Artis Dayak (DAMA), Snowdan Lawan.
Temuai dipebasa dikanggau datai ngulu AMD tu iya nya Menteri Pemansang Sosial Tan Sri William Mawan Ikon, Chairman DAMA 2012 Snowdan Lawan, Direktor RTM Sarawak Datuk Norhyati Mohd Ismail, Sapit Direktor RTM Sarawak Fee Lin Chew, Dekan Fakulti Sains Sosial, UNIMAS, Profesor Dr. Spencer Empading Sanggin, enggau Tuai Raban Editor New Sarawak Tribune / Utusan Sarawak, William Chan.





No comments:

Post a Comment