Thursday, December 13, 2012

AMD 2012 majak semak adan

Rannie Pet benung merindang bala peminat.
KUCHING : Gelar Muzik Dayak 2012 tauka AMD nyau enda berasai makin semak ba penyangkai tauka adan endur bala artis Dayak ngulihka gelar sida dalam industri muzik Dayak ti deka diatur Gerempung Artis enggau Pemerindang Dayak tauka DAMA bepalan ba Dewan Tunku Abdul Rahman tauka DeTAR PUTRA, Universiti Malaysia Sarawak (UNIMAS), Kota Samarahan kena 24 November tu.

Beserimbai enggau AMD tu, kena malam 2 November (Hari Lima) tu tadi DAMA bisi ngatur konsert roadshow kepenudi bepalan ba pasar besar Bouleverd dikena ngelakuka AMD sereta meri peluang ngagai mensia mayuh diperindang bala artis tebilang enggau bala artis ke baru lanjau dalam industri muzik Dayak.
Roadshow ke diatur ba Bouleverd tu mujur nyerakupka bala artis Iban, Bidayuh enggau Orang Ulu.
Entara bala artis Iban, Bidayuh enggau Orang Ulu ke bisi datai rambau roadshow AMD ba Bouleverd.

Beduduk ari nya ngujungka, lebih 500 iku mensia mayuh bela sampal datai ngemataka roadshow AMD Bouleverd ti diserumba enggau bemacham aktiviti bukai baka kuiz, nyual tiket enggau T-Shirt AMD 2012.
Bela bisi datai enggau ngemataka roadshow AMD ba Bouleverd tu iya nya Chairman DAMA ti mega nyadi Kaban Kunsil Nengeri (ADUN) Balai Ringin, Snowdan Lawan.
Embat La La enggau Monica Midi benung kiruh nyediaka tanya kuiz ungkup bala peminat AMD 2012.
Berebak enggau nya, Snowdan diberi basa nyuaka perais ngagai bala peminat ke mujur nyaut kuiz ke ditempa komiti DAMA tauka MC malam nya, iya nya Embat La La enggau Monica Midi.

Program roadshow nya berengkah pukul 7.00 lemai lalu tembu urung pukul 10.00 malam.
Chairman AMD 2012, Snowdan Lawan nyuaka perais ngagai bala pemenang ke mujur nyaut tanya rambau roadshow AMD 2012 bepalan ba pasar besai Bouleverd, Kuching.

Entara bala artis ke bisi datai enggau ngemujurka roadshow AMD ba Bouleverd tu iya nya Nickson Nick ke mai lagu Nama Kebuah Sulu Berubah, Fiedarus Udin (Kasam Pengerindu Tua), Daniel Bampa (Meng Ngejawin, Daleh Lenca Dalem Bada), Jablee Guyen (Chukup Indai Kali, Cinta Kai Biragan), Doris Uji (Aku Indu), Natalie Inez (LOVE), Apai Saloi (Bujang Milih Tisik), Leez Zwita (Nuan Bujang), Rannie Pet ( Aus Pengerindu Ketegal Nuan), Baby Daisy (Indai), Diana Ant Belikau (Jerungkang Tajam Gerenyam), Paul Kappa (Babeh Lew), Gabriel Fairus Louis (Pechaya, Genggam Jariku), Inochi Austin (Rachun Dalam Pengerindu, Nganti), Melissa Francis (Mutus Ati), Edward Sayu (Ayo Ayo, Buje Rimunguh), Raban Hevance (Aku Nemu, Bedau Alah), Four Kadun (Selamat Ondu Jadi Sindo, Maka Oro) enggau Raban Force Beat (Leman Mensia enggau lagu tema AMD Terunggul Gemilang).
Melissa Francis begambar ke pengingat enggau bala peminat iya.

Sebedau tu, konsert roadshow AMD kala diatur bepalan ba E-Mart Tudan, Miri, Farley Mall, Bintulu, enggau ba Mini Stadium Sri Aman.
Pasar Besai Bouleverd entara ke penudi endur DAMA ngelakuka AMD 2012 sebedau bala artis besemekih ngulihka gelar pemadu tinggi dalam industri muzik Dayak ke deka ditemu pumutus kena malam 24 November ba DeTAR Putra, UNIMAS berengkah pukul 7.00 lemai.

Bisi 14 kategori nyengkaum 20 iti gelar ke deka diberi ungkup AMD taun tu. Entara gelar ke nganti bala pemenang tu iya nya : Gelar Penau Seumur Idup (Tiga gelar ungkup Iban, Bidayuh enggau Orang Ulu), Artis Lelaki Pemadu Manah (Siti Gelar - Kategori Tebuka),

Artis Indu Pemadu Manah (Siti Gelar - Kategori Tebuka), Lagu Dayal Pemadu Manah (Tiga gelar ungkup Iban, Bidayuh enggau Orang Ulu), Artis Baru Dayak Pemadu Manah (Siti Gelar - Kategori Tebuka), Raban / Duo Senentang Vokal Pemadu Manah (Siti Gelar - Kategori Tebuka),

Gelar Album (Tiga Gelar ungkup Iban, Bidayuh enggau Orang Ulu), Kulit Album Pemadu Manah (Siti Anugerah - Kategori Tebuka), Video Pemadu Manah (Siti Gelar - Kategori Tebuka), Leka Lagu Pemadu Manah (Siti Gelar - Kategori Tebuka), Tusun Muzik Pemadu Manah (Siti Gelar - Kategori Tebuka),

Artis Balada Pemadu Manah (Siti Gelar - Kategori Tebuka), Artis Rock Pemadu Manah (Siti Gelar - Kategori Tebuka), Artis Pop Kreatif Pemadu Manah (Siti Gelar - Kategori Tebuka).
RAMI AMAT...Pemayuh bala peminat ke bela datai nyukung roadshow AMD ba Bouleverd.

Bala peminat AMD 2012 mega agi bisi peluang meli tiket-tiket AMD ke berega RM30 enggau RM50 ari mayuh palan endur ke dirintai baka : Kaunter Bus Asia Terminal Batu 3.5, Kuching, Kaunter Bus Asia ba Kuching Sentral, Kaunter Bus Asia ba Serian, Palan Pemerindang Kumang Kelung Karaoke-Tabuan Jaya sepiak Showroom Nissan enggau Restauran Simply Sedap, Semak Roundabout Besai Kuching (013-8454322), Supreme Chicken Rice- Tabuan Jaya, sepiak Showroom Proton, semak roundabout Kuching (082-368739), 1 Stop Cafe- Batu 3, Opis lama Astro, Kuching (082-236072), Supreme Chicken Rice- ba belakang RHB Bank enggau E-Mart Matang, Kuching (082-684722).


No comments:

Post a Comment