Roadshow AMD ba Sri Aman rami

Panggau Pemerindang Roadshow AMD 2012 ba Sri Aman.

SRI AMAN : Konsert Roadshow Gelar Muzik Dayak 2012 tauka AMD ke diatur ba Sri Aman kena 20 Oktober tu tadi nerima sukung ke positif ari mensia mayuh.

Ketegal pengagit enggau sukung ari mensia mayuh ke deka meda roadshow nya ngujungka semua palan duduk dalam Mini Stadium Sri Aman nyau penuh.

Lebih 1000 iku orang ari menua Sri Aman enggau menua bukai ke semak bela sampal ngemataka konsert roadshow  Gelar Muzik Dayak 2012 ke diatur ba Sri Aman malam nya.

Bela bisi datai enggau ngemataka roadshow AMD ba Sri Aman tu iya nya Chairman DAMA ti mega nyadi Kaban Kunsil Nengeri (ADUN) Balai Ringin, Snowdan Lawan.

Bunyau (tengah), Mujap (kanan) enggau Apai Saloi (kiba)

Lebuh dirandau Utusan Sarawak senentang program raodshow AMD ba Sri Aman, Snowdan madahka, chukup berasai gaga ati meda sukung ke chukup manah ari bala peminat industri muzik Dayak ba menua Sri Aman.

"Sukung ari mensia mayuh rambau roadshow AMD ba Sri Aman chukup manah lalu aku ngarapka bala mensia ulih sampal baru datai ngemataka roadshow AMD 2012 kepenudi ti deka diatur ba Bolouverd, Kuching kena 2 November tu berengkah pukul 6.00 lemai," ku iya.


Snowdan mega madahka maya roadshow AMD ba Bolouverd tu ila, sekeda artis enggau pemuzik ari raban bansa Bidayuh deka dikanggau datai merindang mensia mayuh.

Tuju konsert tu diatur Gerempung Artis enggau Pemerindang Dayak tauka DAMA dikena ngelakuka AMD 2012 ke deka diatur ba Dewan Tunku Abdul Rahman tauka DeTAR PUTRA, Universiti Malaysia Sarawak (UNIMAS), Kota Samarahan kena 24 November tu.

Entara bala artis ke datai rambau roadshow ba Sri Aman.

Berengkah pukul 8.00 malam, Jones Mukan iya nya seiku artis ari Kompeni Pemerindang Recording Studio dulu mungkal program roadshow AMD ba Sri Aman enggau dua buah lagu ke dikumbai Dara Bajik enggau Dara Gila Kerepai.

Udah nya, mensia mayuh terus diperindang 16 bala artis ke bukai.

Entara bala artis ke bisi datai ba Sri Aman enggau ngemujurka roadshow tu baka Rannie Pet mai lagu Aus Pengerindu Ketegal Nuan enggau Anang Udu Beduan, Baby Daisy (Indai, Nuan Penyuan Tubuh Aku), Eisner Nala Jackson (Sebentuk Tinchin), Apin And Project 2 (Laila, Dunya Baru, Philip Jabu (Ngiga Penemu),

Embat La La (Sulu Ati Nadai Tingku, Kelab Bujang Tuai), Gabriel Fairus Louis (Pechaya, Genggam Jariku), Inochi Austin, Reymus Bilong (Bintang Pengari, Luya Temawai Lama), Bujang Lemanak (Rebah Punggu Enda Bedaun, Dewi Norina),

Florence Lo (Ai Mata Lelenggau Ba Tanjung Batu, Begedi Tang Sayau), Chia Cha (Patah Ati, Realiti), Fiedarus Udin (Kasam Pengerindu Tua, Sanggup Ngugi Duet JR), Leez Zwita (Berumah Ba Ati Orang, Nuan Bujang) enggau Apai Saloi (Bujang Milih Tisik).

ARTIS BARU...Leez Zwita

Program roadshow AMD ba Sri Aman tu mega ditachuhka enggau penatai dua iku penyampai stesyen radio Iban tebilang ari stesyen Wai FM Kuching iya nya Stonton James enggau Ken Micheal (Bunyau enggau Mujab).

Gaya hari ke chukup manah malam nya ngujungka mensia mayuh ari menua Sri Aman bepeluang ngemataka bala artis nyadaka lagu ti dikerinduka sida nyentuk ngagai pengujung program ke abis urung pukul 11.00 malam.

Artis ke penudi nutup program roadshow ba Sri Aman tu iya nya Taju Remaung ke mai dua buah lagu iya nya Kumang Ati Ku enggau Enda Sanggup.

Pengawa bukai diatur berebak enggau program roadshow tu baka bejualka tiket AMD 2012, nyual T-Shirt DAMA  enggau bejualka sekeda CD lagu bala artis Dayak.

Sebedau tu, roadshow AMD udah diatur bepalan ba E-Mart Tudan, Miri enggau Farley Mall, Bintulu.
Menua Sri Aman entara palan ke lumur dua ke penudi endur DAMA ngelakuka AMD 2012 sebedau bala artis besemekih ngulihka gelar pemadu tinggi dalam industri muzik Dayak ke deka ditemu pumutus kena 24 November ba DeTAR Putra, UNIMAS.

PEMINAT AMD 2012...Bala peminat AMD 2012 benung ngemataka Embat La La ke benung ngelakuka T-Shirt DAMA 2012.

Bisi 14 kategori nyengkaum 20 iti gelar ke deka diberi ungkup AMD taun tu. Entara gelar ke nganti bala pemenang tu iya nya : Gelar Penau Seumur Idup (Tiga gelar ungkup Iban, Bidayuh enggau Orang Ulu), Artis Lelaki Pemadu Manah (Siti Gelar - Kategori Tebuka), Artis Indu Pemadu Manah (Siti Gelar - Kategori Tebuka), Lagu Dayal Pemadu Manah (Tiga gelar ungkup Iban, Bidayuh enggau Orang Ulu), Artis Baru Dayak Pemadu Manah (Siti Gelar - Kategori Tebuka),

Raban / Duo Senentang Vokal Pemadu Manah (Siti Gelar - Kategori Tebuka), Gelar Album (Tiga Gelar ungkup Iban, Bidayuh enggau Orang Ulu), Kulit Album Pemadu Manah (Siti Anugerah - Kategori Tebuka), Video Pemadu Manah (Siti Gelar - Kategori Tebuka),

Jones Mukan

Leka Lagu Pemadu Manah (Siti Gelar - Kategori Tebuka), Tusun Muzik Pemadu Manah (Siti Gelar - Kategori Tebuka), Artis Balada Pemadu Manah (Siti Gelar - Kategori Tebuka), Artis Rock Pemadu Manah (Siti Gelar - Kategori Tebuka), Artis Pop Kreatif Pemadu Manah (Siti Gelar - Kategori Tebuka).